ក្រុងព្រះសីហនុ៖ បុរស២នាក់ត្រូវបានសមត្ថកិច្ចឃាត់ខ្លួននៅរសៀលថ្ងៃទី២៧ ខែធ្នូ ឆ្នាំ២០២៤ បន្ទាប់ពីធ្វើសកម្មភាពលួចខ្សែភ្លើងពីផ្ទះមួយកន្លែង ស្ថិតក្នុងក្រុមទី១៧ ភូមិ៥ សង្កាត់៤។
ស្ត្រីរងគ្រោះឈ្មោះ អែម សុខគីម អាយុ៤១ឆ្នាំ ជាអ្នកលក់ដូរបានប្តឹងទៅសមត្ថកិច្ចអំពីករណីនេះ។ ភ្លាមៗនោះសមត្ថកិច្ចបានចុះអន្តរាគមន៍ឃាត់ខ្លួនជនសង្ស័យនៅនឹងកន្លែងបញ្ជូនយកមកអធិការដ្ឋាននគរបាលក្រុងព្រះសីហនុ និងដកហូតបានខ្សែភ្លើង១ខ្សែជាភស្តុតាង។
ជនសង្ស័យឈ្មោះ ព្រំ ឡែហ៊ាង អាយុ២៦ឆ្នាំ ជាងឈើ និងឈ្មោះ សន ណាវីន ហៅអាក្របី អាយុ១៧ឆ្នាំ បានផ្លោះរបងដែកចូលទៅក្នុងផ្ទះ តាមទ្វារក្រោយដែលគន្លឹ:ទ្វារខូច។ ក្រោយសាកសួរ ជនសង្ស័យខាងលើបានឆ្លេីយសារភាពថា ខ្លួនពិតជាបានធ្វើសកម្មភាពលួចកាត់យកខ្សែភ្លើងពិតប្រាកដមែន។ បច្ចុប្បន្នជនសង្ស័យទាំង២នាក់ខាងលើកំពុងឃាត់ខ្លួននៅស្នងការដ្ឋាននគរបាលខេត្តព្រះសីហនុដើម្បីកសាងសំណុំរឿងចាត់ការតាមនីតិវិធីច្បាប់។
អាជ្ញាធរបានក្រើនរំលឹកប្រជាពលរដ្ឋឱ្យមានការប្រុងប្រយ័ត្នខ្ពស់ និងរាយការណ៍ពីសកម្មភាពគួរឱ្យសង្ស័យជាបន្ទាន់ ដើម្បីទប់ស្កាត់ឧបទ្ទវហេតុស្រដៀងគ្នានេះ៕
